黃日華太太梁潔華2013年患上「急性骨髓性白血病」，日前有報道指梁潔華舊病復發，經常出入醫院。

兩人女兒黃芷晴今日下午喺中環一間婚紗店擔任模特兒行騷，之前有報道影到黃芷晴拍拖時冇乜笑容，仲話佢一直都好擔心媽咪病情，芷晴今日講到媽咪嘅時候，神情都輕鬆：「梗係唔係啦，我都唔記得嗰日係邊日。」

芷晴澄清媽咪唔係病發，只係去覆診：「一星期keep住去一、兩次，因為個病，媽咪血嘅指數比平常人冇咁穩定，所以要定期check住。」佢話媽咪病況其實好穩定，但因為抵抗力低啲，好多時間都留喺屋企休息，佢透露媽咪有份搞兩個大戲騷，但冇去演出，可能係咁先令朋友擔心。

問到媽咪有冇機會短期內再演出？佢話：「睇佢意願啦，因為都辛苦，我哋都唔想佢咁操勞。」至於媽咪幾時先會完全康復？佢都唔知：「咁要問醫生，又唔係啲咩病，只係一直keep住檢查，過多5年又會穩定啲。」

黃芷晴話爸爸都仲係大忙人，冇專登減少工作，但仍然抽好多時間陪媽咪，而佢自己都要打理耳環生意，但會抽多啲時間喺屋企做耳環，多啲陪媽咪。佢話等媽咪情況穩定先會諗結婚，佢又否認喺ig貼婚紗相係想沖喜，只係為咗今日活動試衫。