【韓流】網民又要抵制?尹恩惠有望事隔5年拍新劇
尹恩惠
韓劇《咖啡王子》嘅33歲女星尹恩惠,前年演出大陸綜藝節目《女神新裝》涉嫌抄衫後形象插水,無論做咩都畀韓國網民炮轟,就連前日喺Instagram做好事宣揚領養,都畀網民批評話佢想借事件洗底。
不過尹恩惠就未放棄喺韓國演藝圈活動,繼早前演出綜藝節目《需要對話的狗貓》後,今日韓國方面再有報道,指尹恩惠有望擔正明年播出嘅新劇《愛情像人一樣》(暫譯),如尹恩惠落實演出,將係佢繼2013年嘅《未來的選擇》後,事隔5年再拍劇。對此,尹恩惠所屬事務所表示:「尹恩惠確實收到《愛情像人一樣》嘅演出提案,不過目前仲係商討階段,未確定演出。」
據知《愛情像人一樣》係拍攝《師任堂,光的日記》嘅尹尚浩導演嘅新作,講述撞有AI人工頭腦嘅人類與一名感性嘅女子相愛嘅故事。尹恩惠有望演嘅角色為孔俊熙(音譯),係一名高中體育老師。
更多娛聞,喺晒《娛果》
http://fb.com/appledailyent