墨爾本城（圖）雖然近仗表現跌watt，不過在周六的澳職聯到訪威靈頓鳳凰時，有多達六名主力刑滿復出，加上鳳凰又實力麻麻，預計墨城可以反底勝出，墨城讓平/半捧上盤。（球賽編號：星期六2；有線64及203台今日2:35pm直播）
有「澳職藍月亮」之稱的墨爾本城近仗表現滑落，近11場聯賽只得兩勝五和四負。幸好在周六訪威靈頓鳳凰時，一眾主力如前鋒科拿路利、費蘭度班頓、老將卡希爾、中場魯克巴坦、奧沙麥馬歷及後衞文尼梅斯卡特都坐完波監，可以復出，絕對無懼要作客。至於威靈頓鳳凰雖然亦有前鋒史美斯刑滿復出，但中場古希美及後衞杜蘭迪要停賽，而且近四場又三輸，就算主場受讓亦難靠。

光輝獅吼做「大」騷

至於同日珀斯光輝迎布里斯班獅吼的澳職，由於兩隊都攻力不俗，而且近仗交手亦入球偏多，今役宜取入球中位數[2.5/3]的入球「大」。光輝有中場迪亞高卡斯度近兩場入四球，其餘攻擊主力如前鋒安迪基奧治等又腳風順，適逢獅吼一對前鋒占美麥卡倫及班頓波里路亦入球停不了，而且光輝近三次迎戰獅吼，總入球都在四球或以上，今役宜吼「大」。文：何西