韓片《我的野蠻女友》導演兼編劇郭在容嘅新作《遇上世界上另一個你》（Colors of Wind），由日劇《惡作劇之吻～Love in TOKYO》人氣男星古川雄輝夥拍女星藤井武美擔演，電影早於年頭喺日本上映，香港則定檔於下周四開畫。

《遇上世界上另一個你》係郭在容籌備8年之作，佢一直為電影物色景地，最終落實喺北海道拍攝，問到籌備過程中最困難嘅事時，郭在容表示：「首先，拍電影已經唔係容易嘅事。而日本電影多係由原著小說或漫畫改篇，所以要先將故事內容變成漫畫，向投資者展示，之後再變成劇本。」

而選角方面，電影一開始另有人選，不過因為延遲製作，到開拍時原本嘅人選因檔期問題而要辭演。郭在容因為拍攝《我的機械人女友》而跟綾瀨遙經理人變熟，當時對方推薦古川雄輝，郭在容亦滿意呢個人選。女主角方面，因為藤井武美係新人，一開始指導佢演戲都有啲困難，不過藤井武美好快就進入狀態。提到於北海道拍攝，郭在容表示早於2002年因為《我的野蠻女友》而去北海道參加電影節，當時已被北海道嘅景色吸引，想去當地拍戲。

提到代表作《我的野蠻女友》，郭在容表示都想跟女主角全智賢再合作：「其實全智賢結婚前已經有傾過再合作，不過因為種種原因，加上當時我有好多戲要拍，好忙，最後未能成事。依家當然想再合作，不過似乎機會唔大，因為全智賢已經係兩子之母，佢都忙。」問到如果有機會，會唔會為全智賢開拍《野蠻阿媽》？郭在容笑言：「可能會變成恐怖片。」

至於大陸於2010年開拍《我的野蠻女友2》、前年又開拍《我的新野蠻女友》，郭在容表示：「開拍前有收到劇本，想搵我親自執導，不過睇完劇本後太失望，因而拒絕咗。因為太失望，所以冇睇嘅意欲，電影上映時都冇睇。」

問到會唔會拍《我的野蠻女友》續集，郭在容坦言「好頭痕」：「因為《我的野蠻女友》嘅角色太經典，要搵返好似全智賢及車太鉉呢類演員去演出呢啲角色，要花好多時間去選角，而且好難搵到啱嘅角色，所以唔係容易嘅事。」

郭在容就透露佢之後會開拍改篇自漫畫《HO!》嘅新片，因為女主角係一名女大學生，佢都想搵新演員演出：「我鍾意搵新人，好開心發掘新人，見到新面孔。」問到男方角有咩心水人選時，郭在容提到跟孫藝珍合作韓劇《經常請吃飯的漂亮姐姐》嘅上位男星丁海寅。

另外，郭在容提到菠蘿娛樂董事Charlie，指對方年青有活力，好開心識到呢個新朋友，又透露二人都有傾將來嘅合作計畫，令人期待。

更多韓流，喺晒《娛果》
http://fb.com/appledailyent