各位球迷聖誕快樂，無論你同朋友或者另一半係唔係支持同一隊球隊都好，聖誕呢個普天同慶日子，都希望大家可以開開心心，過一個快樂聖誕。好似朗尼話齋，英超球員都想聖誕同家人一齊過，不過礙於英超快車，呢個願望基本上冇可能實現。今年雲高爾就特別放曼聯1日假，等佢哋可以喺聖誕佳節享受天倫之樂。係唔係真係有用，各位球迷可以喺球場上搵答案。聖誕之後就係1月轉會窗，唔少球員都會藉快車期去表現自己，睇吓有冇機會更上一層樓，轉到更「豪」球隊。不過有位巨星，應該心情都幾複雜，佢，就係巴洛迪利（圖）啦！

信佢入波利記贏3:1

除咗阿仙奴外，我都好like巴洛迪利。點解？因為佢雖然有搗蛋一面， 但同時有一顆善心，係一個好有血性嘅球員。雖然佢唔似C朗、美斯咁完美；雖然佢會好直接用網絡世界同球場上嘅一舉一動去表達自己；雖然佢有時會犯錯，但反而咁樣更加「活生生」，而唔係只係印喺海報上嘅球星。
今年佢喺利物浦踢得唔算好，傳媒當然唔會放過佢。呢個情況完全係印證咗簡東拿名句：「海鷗（記者）跟住漁夫（球員），係因為佢哋以為漁夫會將沙甸魚（不好事情）拋落海。」巴神雖然喺聯賽未入波，但其實紅軍球員都好支持佢，而且佢亦比以往更加忍讓，但係傳媒就係會不停搵佢做新聞。有時真係想知傳媒心入面諗緊咩？唔通想用公眾壓力，去摧毀一個球員，咁樣會令佢哋開心啲？
回應壓力只有一種方法，就係令自己變得更強。今個星期利物浦作客般尼，上場紅軍打少個都踢出氣勢，劣勢下逼和阿仙奴，今場更加有巴洛迪利復出，前線有番個目標人物會更好踢，相信巴神會用入波去帶領利記贏波，贏幾多？贏3:1囉！