【新增短片】
由香港本土「Miss Mo」毛孟靜、人民力量「慢必」陳志全、「阿廸」朱凱廸同街工梁耀忠早前成立的「議會陣線」，今午請嚟一班議員助理同傳媒舉行聖誔派對。梁耀忠由於一早離港去旅行，所以玩遊戲時，就變成「兩王一后」大格鬥。

其中最搞笑，莫過於問到「議會陣線」成立日期時，只有阿廸答啱係11月16號，令到當日主持記招的Miss Mo得悉答案後大嗌：「我死囉！嗰日係我揀添啊！」，令現場傳來陣陣爆笑聲。被問到立法會標誌係乜嘢色時，就只有慢必答啱係黃同灰色，搞到Miss Mo不禁即場搵個立法會標誌望望，再哀嘆：「我一路以為黃黑啊!」

最終玩完遊戲，慢必答啱最多題勝出，得分第二的阿廸同包尾的Miss Mo，就要接受議助大懲罰，要求兩人向議助派利是，又或者兩人同食一條百力滋! 呢個懲罰嚇到兩人呆咗呆，更要搞笑離場商議，最終兩人決定「一人食一支百力滋」，再每個議辦派多封利是。贏的慢必其後亦攞出幫港版丹麥女孩拍戲的1,000元片酬，畀議助做獎品，氹得議助好開心。

議會陣線今日搞聖誔派對時好環保，除咗每人要自備餐具，唔用即棄餐具，連禮物都只係用廢紙同唔用的標語包裝。