以往每逢到呢個時候，做股票行嘅行家都會特別開心，皆因大多數證券行嘅慣例係喺農曆年底派發雙糧同花紅，而且更會請全公司員工食餐晚飯當係團年。
不過今年嘅情況就可以話完全唔同晒，好多股票行唔單止取消派發雙糧同花紅，有啲更為咗縮減成本，專登將團年飯都改喺新年後同春茗酒一齊食，實行慳得幾多得幾多，以往年尾中環區酒樓晚市專做股票行團年飯生意嘅光景已不復再。
有晚韋衡同幾個行家一齊去其中一間酒家食晚飯，坐足成晚都未坐滿客，情況就好似中環區星期日早市咁靜。照睇落去可能會有啲中環區嘅酒樓捱唔住，喺農曆年後關門大吉，到時行家要聚腳可能又會少咗啲地方。