伍衛國、筱靖、陳嘉桓，沈國林、崔建邦，噚晚喺灣仔出席食店開幕活動，伍衛國話林慕德8月作品展，自己有份做嘉賓：「佢搵我，仲未排練，我冇唱過佢作品，但叫到我都好榮幸，我叫佢揀首歌畀我唱，佢揀咗蔡楓華嘅《無奈只有恨》，我冇聽過呢首歌，o依家聽緊操練。」

早排都有幫大台拍劇嘅佢，最近少有喺幕前演出，佢話o依家正係享受人生：「哎！我o依家做唔到伍小生㗎喇，雖然食素、做運動、游水，我冇食防腐劑。但我驚自己記性唔好，驚冇時間讀劇本，生吞蛇點得㗎，拍劇要做功課。」講到自己七老八十咁，其實佢今年都只係64歲。