梁詠琪（GiGi）早前接拍電影《八個女人一台戲》，這次是她與鄭秀文（Sammi）相隔20多年後再度合作。GiGi早前接受《蘋果》訪問，片中她飾演一名凡事寸土必爭的女星，她感激導演關錦鵬給予她很大空間：「有日導演走嚟問我，GiGi你以前做戲係咪都咁輕鬆，我話唔係，因為呢個階段嘅我好鍾意個劇本，我每一場戲都會有鍾意地方，所以咪好輕鬆，又有足夠時間準備，自然做到大家要求。」

學識放下先自在

GiGi指整套戲是講7至8日內所發生的事，事前一眾演員都圍讀劇本，她說：「去諗番7日之前發生乜事，其實好多嘢，因為一嚟拍已經講緊7日內嘅事，我哋都無乜拍番之前回憶片段，等觀眾自己去聯想，我哋只係以對白，兩人之間情感去交代。」拍攝前GiGi要消化戲中她與Sammi多年來的恩怨，因此圍讀過程令她獲益良多。

GiGi回想戲中所謂的恩怨，其實只是彼此越想越多，她說：「現實生活一樣，有時做嘢總會有錯摸嘅事發生，因為佢咁，所以我咁做，但係又唔會去問，心內就會覺得件事係自己諗嘅咁，尤其呢一行好易有呢種心病，但呢啲無人醫到你，係要自己醫，源頭係來自自己，點學識放下去，咁先自在啲，令人生更加舒服。」
採訪：馬建華
攝影：陳慧安
髮型：Pius Yiu (Orient 4)
化妝：Dephine Chan