選舉前夕，阿爺梗係想香港搞多啲凝聚唔同界別嘅組織，以便有喺需要時發揮實際功用。今日又有一個獲北京支持嘅團體誕生，身兼全國政協委員嘅廠商會前會長施榮懷牽頭成立「香港北京交流協進會」，陣容星光熠熠，名譽會長包括吳光正、李家傑同黃志祥等猛人，何超瓊更係四名副會長之一，同施榮懷拍住上搞好阿爺嘅新Baby。

查實賭后有份喺個會打骰，皆因佢係北京市政協常委，梗係都要幫手搞吓活動，深化港京兩地嘅交流溝通同合作。何超瓊今日亦著得靚靚，以主人家身份接待包括全國政協副主席董建華、中聯辦主任張曉明及特首梁振英等嘉賓。佢喺致辭環節，更獲安排代表北京市政協主席發言，可見地位舉足輕重。

不得不提嘅係，唔少嘉賓致辭時用普通話，個個千篇一律話支持特區施政，但賭后代表北京市政協主席致辭時卻講廣東話喎，認真與眾不同。

身為協進會會長嘅施榮懷話，希望藉住呢個平台，更好地團結兩地人士發揮橋樑作用，擴大交流兼引導社會更多參與港京嘅經濟發展同建設。八方聽聞，佢哋嘅會名特別安排香港先過北京，皆因始終係香港發起，要分吓莊閒嘅。而阿董、張曉明同梁振英今日齊齊被問到齊昕事件，但都封嘴冇回應。