韓國最大娛樂公司SM事務所多次傳出經理人對粉絲郁手郁腳嘅是非,早前男團EXO嘅經理人先被捉到正,喺韓國機場被人影到打粉絲,拍對方後腦之餘,仲令對方前額撞向相機而受傷,所以被罰款約7,000港元。
隔咗冇耐,EXO嘅同門師妹團RedVelvet嘅經理人喺上星期五又再被捉到對粉絲推粉絲,即時引起網民炮轟。
有粉絲就影低上星期五,當RedVelvet完成音樂節目《MusicBank》之後,佢哋嘅經理人就行頭帶佢哋離開電視台,行去拎保母車,當粉絲見到RedVelvet出嚟嘅時候就慢慢咁行近偶像,仲叫偶像小心返屋企,點知個經理人就一直對粉絲呼呼喝喝,仲用粗口叫粉絲唔好接近RedVelvet。
行行下,經理人仲將一個原本同RedVelvet成員保持一段距離嘅粉絲推開,行為粗暴。
事後,網民都非常好嬲,仲話SM嘅經理人成日都對粉絲郁手郁腳,令藝人同SM嘅形象大跌。