【新增動新聞】
般尼茅夫禮拜五晚喺英超以2:1反勝白禮頓，幫球隊喺今季英超開齋嘅，係34歲嘅老將迪科爾。雖然呢個係迪科爾今季第一個聯賽入波，但原來佢之前已經幫般尼茅夫入過波，大家又記唔記得呢？

講緊嘅係16年前嘅事喇，不過般尼茅夫當年並唔係英超球隊，只不過係英國第三級別嘅乙組球隊（果陣仲未有英冠）。出道兩季嘅迪科爾喺韋斯咸唔受重用，但係去到般尼茅夫就梗係殺晒喇。迪科爾果一季喺各項賽事幫般尼茅夫入咗19球，當中嘅最後一球，同佢今日所入嘅一球，相差足足5,977日！

另一方面，白禮頓亦都成為迪科爾職業生涯第36隊入波嘅英超球隊，佢喺英超總共鬥過39個唔同對手，但係對住錫菲聯（2場）、列斯聯（4場）同埋屈福特（6場）就從來未入過波。