此日在街上遇到教育界前輩森哥，自不然要傾幾句。森哥在教育界退休多年，平時只為教育事務做義工，樂此不疲，不過森哥近月最開心嘅，就係佢位公子在美國讀書工作多年，卒之因緣際會，奉派回港開辦一間投資基金公司，以高級董事總經理及環球資本市場主管名銜，掌管該公司之亞洲事務，換言之，森公子雖然以後經常往返紐約香港東南亞，在港日子不太多，但起碼以香港為工作基地，森哥與太太可以有多啲時間與兒子見面，開心之至。
森哥有兩位公子，皆在美國名校讀書，攞得MBA之後，同在華爾街投資銀行工作，於是樂不思蜀，直至二○○一年九一一，森哥在電視新聞直播睇到紐約世貿大廈倒下來，而兒子就在世貿大廈內辦公，為之驚心動魄，徹夜難眠，二十四小時後，兒子方能打通電話回港報平安，森哥幾乎喜極而泣。到現在，一位回港，好滿足矣。森哥話：「遲啲請你與我個仔食餐飯，向你請教本港及亞洲事務。」豈敢，豈敢，啲世姪喺紐約做得咁掂，梗係叻過左丁山呢啲得把口之輩，不過吃飯傾吓偈，當然冇所謂之至。
問森哥最近忙啲乜，森哥話佢於一九八六年自塘尾道官立學校退休後，仍與舊同事有聯絡，今年係塘尾道官立學校金禧校慶，校友舉行一個「金禧校慶」舊生聚餐，於二月二十八日星期六在學校舉行自助餐，又會於五月十九日舉行金禧校慶綜藝晚會暨校友會成立典禮，在荃灣大會堂舉行，主禮嘉賓係懲教署署長郭亮明（六五年畢業校友）。森哥話塘尾道官立嘅知名校友有黃重光醫生、王津、教統局副秘書長葉曾翠卿等等，希望歷年校友能報名參加，報名可以打電話返母校（23930800）或上網www.tmr.edu.hk。森哥可謂有心人，但凡中文大學、東院道官立、塘尾道官立等與佢有關之學校嘅事情，佢都努力奔走，不辭頻撲，唔知係唔係因為勤於為校友服務，不知老之將至，雖已過古稀之年，森哥仍然滿頭黑髮，健步如飛，活力十足。如果要佢日日在家呆坐，相信已經早生華髮咯。如森哥者，乃長者生活之榜樣也。