陳柏宇最近喺剛播映嘅港視劇《大眾情性》扮30歲處男，今日佢去到商台，不過唔係宣傳新劇，係宣傳新歌《回眸一笑》，首歌只係講好淡然咁回憶過去嘅感情。

31歲嘅柏宇話自己大個咗成長咗，所以開始要計劃下將來，仲話2017年會同女友符曉薇結婚，佢話：「我準備好做人老公，已經當佢係屋企人。」

會唔會同女友婚前同居，陳柏宇就話女友有咁嘅打算，佢自己反而冇所謂，但對於「擺酒」呢樣嘢，同好多香港情侶一樣，有分歧，佢話:「我就想外國形式，只係請最親嘅屋企人同朋友，唔想自己結婚仲要招呼百幾人，但係女朋友想擺酒，所以都係遲啲先決定。」言下之意係女友想大搞?