來自廣州的黃麗梅（May姐），主持亞視飲食節目《中國八大名菜》，被網民批評她肥又娘，從小習慣刻苦的她其實早棄糖衣軀殼，寧願做個兩腳泥濘、被海風吹到髮亂妝溶的「村姑」，攀山涉水，餐風宿露，去為每道菜尋根。
無綫長期炮製美食節目對撼，May姐依然打不死，收視企硬；杜琪峯轟無綫製作求其冇新意，她也敢說友台講飲講食，都是抄她，《近廚得食》還要抄得唔湯唔水；「搵蔡瀾逛菜欄，嘥咗！」吞棕櫚蟲、食青蛙，她夠膽夠博，「我會一世效忠ATV！」村姑變身《戰狼300》，繼續奮力為亞視死守收視城牆。　撰文：朱倬誼

主持篇
勤力不錫身致勝

亞視曝光率最高的張文慈、陳啓泰，原來都不是鎮台之寶，真正的ATV之寶是《中國八大名菜》系列主持黃麗梅，捧場觀眾平均過50萬，僅次全台最高收視的《六點鐘新聞》，童叟無欺。
被無綫窮追猛打，長期委派不同主持、製作不同飲食節目對撼，May姐的節目收視竟繼續企硬，比《破壞之王》中的周星馳扮打不死加菲貓更硬淨。來自廣州的她一女當關，44歲披甲上陣，為亞視死守收視城牆，她守得住，因為勤力、不錫身，「我做節目親力親為，捉魚捉海鮮，邊個會落池撈魚？邊個會去深山搵中藥？觀眾鍾意睇你親力親為，我唔怕辛苦。無綫嘅飲食節目好有創意，成日搵唔同嘅節目同主持，都係打我一個，但我覺得都係自己嘅節目好睇啲。」

欣賞羅慧娟節目

《味是故鄉濃》、《煮食無界限》之類，幾年來亞視飲食節目巧立名目，說穿都是May姐sell飲食。總之收視好，她自動波拉攏廣告客戶贊助，每年幫公司賺幾百萬廣告費，節目長做長有，所以無綫咬住唔放，不過知己知彼，友台飲食節目但看無妨，她說最欣賞的是羅慧娟主持的《天賜良源》：「睇羅慧娟去外地搵海鮮，打魚、搵象拔蚌，有啲真係尋到根，搵到之後點樣養？點樣食？欣賞個節目似我以前嘅《覓食新煮意》，但覺得係抄。」
美食家Jacky余健志主持的《近廚得食》，是May姐今期對手，她看過，笑說：「做番我6年前《八大名菜》做過嘅嘢，但做得冇我咁好，講唔到村菜精粹，講麻辣嘅話，麻係乜？辣係邊度？點解叫宮保雞丁、夫妻肺片？嗰時我喺節目會講、會尋根，咁先令人覺得有知識性。」
前任挑戰者黃淑儀，主持《吾湯吾水》，May姐覺得大家表達方法不同：「佢搵當地人用中草藥煲湯，着重廣東省附近，我有睇過，印象唔太深刻；以前我都介紹過湯水，我搵嘅係名貴稀有中藥，針對城市人病痛，糖尿病、補血、減肥，要飲邊啲湯。」《蔡瀾逛菜欄》，她只能形容節目太有創意：「蔡瀾係食家，係識嘆，搵佢做呢個節目嘥咗，冇發掘佢長處，逛菜欄？係逛名店、嘆紅酒、食米芝蓮大廚煮嘅名菜，點可以去街市？」

方逸華點名學習

May姐直言無綫從沒叫她過檔，但某監製跟她說過趣事一則，「個監製同我講，話無綫方小姐（方逸華）開會時，講過：『唔識做飲食節目，睇吓黃麗梅點做啦！』真係多謝晒。無綫搵唔搵我冇所謂，我喺亞視有好多空間發揮，我好專一，會一世效忠ATV，搵啱咗，唔想變嚟變去。」
今年3月亞視變動，合約藝員被改制變成職員，May姐辛辛苦苦捱了10幾年，倒頭來公司不簽她做藝員，她幾乎黐了總掣。「唔制呀！我喊囉！吓？公司放棄我？我咁認真做，唔要我啦？我有俾家人遺棄嘅感覺，原來得唔到認同，當時諗住走㗎，後尾公司又話可以繼續做，我至留喺ATV。」
其實May姐是位廉價戰士，月薪平過崔建邦、鄧健泓，「我收嘅人工唔貴，20,000蚊左右，但值得做，我係為咗一份滿足感，搵到好嘢食，同大家分享，有得做會做到老㗎，我仲係一個有口福嘅食神，食盡世界上咁多好嘢。我覺得自己活得精采，人生無悔，係一生修番嚟嘅福氣。」

轉變形象着名牌

為了節目需要，她吃不停，觀眾笑她越做越肥，她體重巔峯期130磅，膽固醇過高，日日跑步、做機，好不容易回落10磅；網民笑她娘，她接受，還說：「話我娘係啱，之前都冇重視形象。一早化晒妝，出海捉魚吹到亂晒，但唔通出海着條Armani裙？我冇化妝師喺身邊，吹到雞飛狗走啦；我成日上山落山，成腳泥又走去着Gucci咩？但今年都會買吓名牌，着吓MissSixty牛仔褲、YSLT恤、3.1PhillipLim。」
攝影：葉君海
場地提供：龍皇酒家

血汗篇
食怪蟲深山採藥

連續6年講飲講食，要將食物尋根到上碟的過程盡現人前，黃麗梅不惜上山下海，日曬雨淋，踏遍中國名山大川，走勻半個地球，姑勿論味蕾為她帶來的感覺是好是壞、是甜是苦，在鏡頭前總high爆尖叫。名菜背後的真正主打，其實是她親自主理的鹹酸菜。

長春食硬青蛙

「有次去長春市拍雪蛤，雪蛤即係青蛙卵巢，點知啲人整熟咗隻青蛙，成隻硬倔倔，好似標本咁，又醜樣、皮又核突，要就咁食，咬落去係腍身，但感覺好惡心。」

馬來西亞吞蟲

「去馬來西亞食棕櫚蟲，係一條條，好似手指公咁大，脹卜卜，要整唔熟，望埋好似仲郁緊，嗰刻我只係覺得做飲食節目要乜都試，食啦，食落係種蛋白質嘅感覺。」

泰國暴曬打魚

「早排去泰國拍《鮮入為煮》，要坐船出海打魚，攝氏30幾度，烈日當空，冇遮冇掩，冇得食冇得飲，曬到暈咁滯，曬咗成日曬到甩皮，我仲以為自己係非洲人，唔識甩皮㖭。」

四川攀山尋藥

「去到四川海拔2,500米至3,000米嘅山上搵最靚嘅杜仲，上懸崖峭壁，好易碌落山，我右膝有舊患，每行一步、每震一下就痛一下，但我繼續支持，因為我放棄就全部人放棄。」

元老篇
經歷四朝代

加入亞視16年的黃麗梅，看盡公司多次改朝換代，快過打針的人事變動，叫一班藝員不知如何自處。「我有心灰意冷過，因為唔知亞視下個朝代仲係咪養你。」May姐曾侍亞視4位話事人，從昔日人肉佈景板捱至今日薄有名氣，過程不無感慨。

1991-99年林百欣　發達期

「以前我喺省台電視台擔正，嚟到香港由佈景板做起，默默耕耘，做路人甲乙丙，得一、兩句對白，入《今日睇真D》後先受重用，嗰段時間係被動角色，公司派乜就做乜。做咗6年《睇真D》，係我搵錢最多、最光輝時間，不停爆騷，月入5、6萬，搵到我嘅第一桶金。97年我用400萬買碧濤花園，雖然𠵱家層樓跌到300萬，但唔緊要，我都冇諗過賣。」

2000-05年封小平　創作期

「封生係我伯樂、啓蒙老師，令我發掘到自己嘅潛能。有日封生叫我上去佢辦公室，問我想做啲乜，有10個節目畀我揀，公司會無限量支持，我話想自己策劃節目，於是同希望工程合作，做咗幫助內地白內障人士嘅《光明之路》，跟住做《根踪香港》，再到飲食節目，一路做到𠵱家。」

2005-06年陳永棋　耕耘期

「陳永棋、劉長樂班底時，我唔知佢哋識唔識我。有次喺公開活動上，我行去佢哋面前介紹自己：『你好，我係亞洲電視藝員黃麗梅，做緊乜嘢節目，唔知你哋有冇睇？』我唔知佢哋會唔會再同我合作，但佢哋知我個節目收視穩定。嗰兩年我繼續做計劃書，我有一班廣告客支持，肯定可以幫廣告部搵錢，呢段日子係耕耘期。」

2007年何定鈞　改革期

「我哋見過面，我聽番啲人講，何生話我有兩樣嘢要改，話我打扮好娘，好大陸味道；同埋講嘢唔好咁咇哩吧啦，斯文啲，其實有時我係真情流露。何生係一個好嘅電視人，希望節目本地化，同觀眾拉近啲、年輕啲，但我連埋喺大陸電視台做，做咗成20年，最辛苦係呢年，7日做兩個節目，全部策劃、聯絡、外景、配音，都係我一個人做晒㗎。」