「雙宋」宋慧喬同宋仲基主演嘅《太陽的後裔》播出後有口皆碑，唔單止於中韓兩國人氣火爆，呢套劇亦有望為日本持續低迷嘅韓劇界打入強心針，事關《太陽》以每集10萬美元（約77.6萬港元）嘅高價賣埠去日本，以全劇16集計，即係穩袋約160萬美元（約1,241萬港元）。

知情人士說：「最近3年，喺出口日本嘅韓劇中，每集版權售價均低於10萬美元，而今次《太陽的後裔》每集版權售價破10萬美元，說明了此劇極具人氣嘅同時，亦反映出韓劇賣埠日本呈現上升趨勢。」

2002年，韓劇《冬日戀歌》hit爆日本，隨後10年間，日本成為韓流嘅最大市場，為了優先搶得韓劇播出權，日本當地電視台更出動銀彈政策鬥搶，但2012年當地以每集30萬美元（約233萬港元）價錢買入張根碩嘅《愛情雨》，卻發現中伏，加上當地一度反韓流，令韓劇於日本人氣遞減。

電視界資深人士分析，今次《太陽》以高價賣去日本，有望以此為起點重新攻陷日本市場。