由新一代男神宋仲基夥拍蘇志燮、黃政民、李貞賢、童星金秀安等人主演嘅韓片《軍艦島》，將於下月喺韓國上映，香港方面亦定檔於8月10號公映。被視為韓國今年最賣座嘅電影，片商亦頻頻公開海報、預告片宣傳造勢。

一眾主演及導演早前更拍片親述「點解係軍艦島」，講述拍《軍艦島》嘅理由及感受，黃政民直言：「拍攝時已經咁辛苦，當時正經歷呢啲事嘅韓國人民到底有幾痛苦？」，宋仲基及蘇志燮亦異口同聲表示「好壓抑」、「比起肉體上嘅痛苦，歷史帶來嘅精神傷害更折磨人。」就算身為女演員，李貞賢亦為咗電影而成身瘀傷及疤痕，相當敬業。

《軍艦島》一眾演員之前現身新片發佈會，由於電影係史實，一眾演員宣傳時氣氛難免好壓抑，不過近日5位演員身處發佈會嘅後台照曝光，只見5位演員都笑得相當開心，可見拍攝時雖然辛苦，但劇組相處融洽。

另外，宋仲基、蘇志燮、黃政民、李貞賢之前為雜誌《BAZAAR》影新相並受訪，宋仲基、蘇志燮及李貞賢就表示黃政民係所有人嘅精神支柱，喺片中飾演慰安婦「末年」嘅李貞賢表示：「拍戲過程覺得辛苦又悲傷，幾乎拍完每場戲後，身體多多少少都會受傷，內心更痛苦到無法言語，如果黃政民前輩唔喺現場，莫名會覺得更加難過，但只要佢喺度，就會覺得充滿動力。」搞到黃政民勁怕醜。