當年今日
關於我們

求驗客手記:費高牛一斷腳返牧場養老 - 求驗客

蘋果日報 2007/11/06 00:00


國際米蘭球星費高近日望住張X光片眼濕濕,皆因周日(4日)35歲牛一嗰日,俾祖記球員尼維特踢裂右腳腓骨;佢喺當地時間周二動手術,起碼要休息兩個月,呢份生日禮物認真唔老利!
35歲生日獲「大禮」
我求大俠勸費高一旦復出,表現不如前都要睇開啲,當今球壇成就拍得住佢嘅,10隻手指數得晒!咁大年紀仲留戀球場做咩?點解唔學中田英壽環遊世界,或者施丹周圍行善?甚至乎去前葡萄牙殖民地澳門搵食,佢個「立立令」嘅頭,睇落都幾有賭王風範㗎!
如果佢嫌澳門亂得滯,想話過清靜啲嘅日子,亦可以帶埋老婆海倫同3位千金,返老家葡萄牙個私家農場養老;得閒叫埋保羅蘇沙、雷哥斯達、古圖等老友,一邊食住碟葡國雞飯,一邊回憶下「黃金一代」嘅輝煌歷史,都咪話唔寫意,好多人恨都恨唔到㗎!
呢次累到費高可能要打石膏嘅,係8月底過完35歲生日嘅尼維特。國米會長莫拉堤好心痛咁出嚟講:「呢次根本就係冇必要嘅攔截,費高係俾對方夾硬踢傷嘅!」不過,呢位捷克「拚命三郎」從來都係勇而不茅,相信今次唔係存心嘅。
尼維特為鐵腳道歉
尼維特周一亦出來道歉話:「對於呢次不幸事情,我覺得非常內疚,我唔係故意踢傷費高,希望佢可以盡快復出啦!」其實,尼維特後生嗰陣出名係鐵腳嚟,俾對方踢極都爬得番起身;今次費高不幸中招,都只能夠怨骨頭唔夠硬,以後飲多啲高鈣牛奶啦!
empty