啱啱喺27號踏入46歲嘅馬德鐘，今日著到西裝骨骨現身金鐘，出席自己擔任服裝品牌代言人嘅招股記招。

講到生日點過，馬德鍾就好似唔想多談，佢指自己一直觀念係工作重要過節日，若果有工作會以工作為先，再問佢點樣慶祝？佢先話：「唔記得，普通食飯。」

經已一段時間冇擔任服裝品牌代言人，佢話今次委任係份好好嘅生日禮物，佢話冇傾到上市後，會否分股份畀佢，不過就實有好多度身訂造西裝。

問到囝囝馬在驤會否受惠？佢話：「都係好主意，囝囝同我差唔多高，只係瘦我少少，等我同老闆提議下。」

原來一直都有唔少模特兒公司想搵佢囝囝行騷，不過佢覺得囝囝要專心學業同游水，暫時都唔會接觸住，加上囝囝未有計劃將來係咪想入行，嚟緊七月佢要到澳洲參加游水比賽，跟當地泳手切磋。