現年38歲，03年拍攝無綫青春劇《當四葉草碰上劍尖時》入行嘅李雨陽，今日終於結婚喇，迎娶比佢年輕11歲嘅圈外女友鄭嘉詠。

李雨陽今日喺微博上載兩張相，其中一張係兩人各戴住一隻結婚戒指，另一張係一對新人笑得好甜咁攞住結婚證書，太太穿上黑白色裙化淡妝，感覺好清純。李雨陽留言：「由今天開始，我們就成為一家人了，願我倆這樣手牽手一輩子～」

今日李雨陽接受《蘋果》電話訪問，聽到記者恭喜，即刻好開心咁：「多謝！多謝！」李雨陽透露同太太相識僅數個月，佢笑晒口話：「係呀，我哋閃婚呀，咁我年紀都唔細，啱就結婚。（係咪奉子成婚？）啊……唔係。」佢透露嘉詠係做兼職地產，仲大讚老婆係好女仔，但記者想追問二人相識經過，李雨陽話同緊屋企人食飯，所以匆匆掛線。

而李雨陽日前亦係微博貼咗多張婚紗照，見佢哋有上遊艇出海取景，又喺一大片花海影相，非常浪漫。