麥菲文馬房匹「加州神箭」晨課譽滿欄邊，原定今日（14日）沙田第八場三班1000米直路賽在港初出，但受注前退出，搞到呢場形勢大變。

練馬師鄭俊偉話呢場佢隻「樂滿家」上場角逐直路賽，幾乎偷襲得手，只係輸畀頭馬「多紅利」1個馬位獲季軍，今場強敵退出，「樂滿家」機會自然提升。

同場另一匹危險份子，不得不提成交價達720萬之貴價拍賣馬「旅遊皇者」，上季直路賽一出即勝後，今季受廣注視，但季內兩次喺雷神莫雷拉胯下跑1200米都三甲不入，難免令人失望。

不過「旅遊皇者」只轉4歲冇耐，難太早下判斷，雷神今期停賽，即有唔少騎師索騎，最終史卓豐可以做到輕磅而攞到帥權，賽前快工夫同月初試閘一手包辦，騎者非常緊張。

「旅遊皇者」埋門直路草地大閘得第4，末段撲上氣勢令豐豐留下深刻印象。佢話：「『旅遊皇者』嘅心智好似BB咁，仍然好嫩，現階段要角逐轉彎路程，對佢心理壓力太大，反而跑番直路賽，至少唔使兼顧轉彎，可能少咗壓力，重現番強勁走勢。」