動作演員既打得又要演得，吳京、甄子丹相信是近年成功的佼佼者，佢哋演過嘅電影全國票房吓吓幾十億，仲躍升荷李活影星，相信好多人都羡慕不已。

最近喺電視劇《飛虎之潛行極戰》入面，相信大家都會留意到一位演反派嘅靚仔新面貌，原來佢就係美國出生嘅大陸演員朱名愚，佢大大隻隻，有成42吋胸肌，仲係跆拳道、空手道高手。

原本朱名愚喺美國大學修讀護士，之後獲得紐約電影學院獎學金，決意追尋電影夢，朱名愚話：「本來我的學費是自己賺錢去付的，所以沒有考慮紐約電影學院的邀請，但當學院卻給我獎學金，我從小便喜歡電影，所以我放棄了護士，去學表演，並於2014年畢業。」

畢業後朱名愚開始實現夢想，卻遇到唔少「黑仔」事件，佢先喺荷李活參與過網劇同電影嘅拍攝，同時參與咗第一部大陸電視劇，可惜因為政治問題冇上映，之後又拍咗李惠民執導嘅《舞櫻》，佢話：「當時在有東方荷李活之稱的橫店拍了5個多月，可惜因為主演是柯震東，再次沒有上映，是遺憾的，但這是一個不會忘掉的經驗，當中有很多學習的地方，對我的發展有很多幫助。」

今年30歲嘅朱名愚決意進軍中、港，為咗保持狀態，一個月內勁減25磅，做運動、控制飲食，佢話：「我是華人，從小我就看香港電影長大，荷李活跟中港兩邊都有很多可以學習的東西，我第一部拍的港片是《九龍不敗》，相信年尾會上映，今次有機會參與《飛虎》，拍攝現場覺令我覺得要學多點廣東話，大家給我一點時間。」

名愚嘅偶像有好多，好似有劉德華、周潤發與成龍，佢話：「我從小就是看他們的戲，夢想有機會可以跟他們面對面就夠了。而目前我的計劃是可以參與愈多愈好，希望將一些荷李活動作片的經驗帶入香港的武打戲中，我很有信心做得到。」

髮型：Headquarters salon By Kelly Mak
服裝：izzue、5cm
場地提供：Absolute Fitness

精選娛聞，喺晒《娛果》
http://fb.com/appledailyent