有「樂壇小強」之稱的阮民安（Tommy），於02年成為MK pop元祖E-kids成員，組合在四年後解散，前晚另一成員林詠倫在尖沙嘴的酒吧騷，宣佈E-kids將會重組，他表示：「之前已經去咗日本錄歌，今年內就會成事，只係想唱歌畀fans聽，過去E-kids個朵唔係咁好，好似MK pop咁，我哋今次都係跳舞唱歌，但會係長大之後嘅感覺。」
Tommy仔前晚接受本報電話訪問透露，是前經理人文滌提出重組，他已聯絡日本的監製朋友及大師級填詞人寫新歌，更有開騷大計：「我哋有個諗法就係喺（賽馬會）綜藝館，當年我哋喺嗰度開咗個唱，亦係我哋唯一一個騷，開完嗰個自殺式個唱之後，我哋都死埋喇。」提到他有打不死精神，他笑言：「我哋都知𠵱家啲歌手好勁，幾首歌就開紅館，冇乜所謂啦呢個年代，扮棋都上到紅館！」擺明暗寸早前在紅館開騷的吳業坤。

坤哥：佢有讚我

坤哥回應傳媒訪問，他表示聽過E-kids的歌，更讚是個好回憶。對於Tommy的言論，他大方說：「Tommy冇暗寸我嘅，見到佢嘅fb喺我攞獎時，佢都有讚賞我啦！我覺得佢講呢番說話，第一，佢冇指名道姓，第二，我覺得佢係講緊喺呢個年代，只要肯去做肯去努力，肯朝住一個方向繼續堅持，就可以做到自己嘅夢想。」
採訪：盧妹、皓騫
攝影：盧妹