人來人往嘅深水埗街頭，一架後座開住門嘅白色私家車高速掟彎，後座男人捉住道門幾乎跌喺地下（箭嘴示），三個男人追住架車。講緊嘅唔係電影戲碼，而係真人真事。前日下晝5點幾，深水埗桂林街港鐵站出口對開位置上演咗呢一幕，目擊者大多都未識得畀反應，私家車同三個追車者已揚長而去。

三人狂奔追截　撲朔迷離

讀者何先生前日揸車泊喺黃金電腦商場外等朋友，佢話過程只得一剎那，一開始見到車頭前方有一個孭背囊嘅男人由桂林街跑出，神情緊張企喺路中心，後方隨即傳出響胎聲。冇幾耐一部白色私家車喺何先生面前經過，「見到一架白色私家車好高速咁駛過嚟，後座車門打開咗，有個男人差唔多跌出嚟」，嚇到行人雞飛狗走。
何先生話，私家車高速掟彎，令左後座嘅男乘客差啲拋離車廂，雙腳伸出車外，場面驚險。原本孭背囊男人想攔截私家車但唔成功，而私家車未有收慢，繼續急轉入桂林街，男乘客竟成功返回車內，其後再有兩名孭背囊男人尾隨追截。但究竟發生乜嘢事呢？警方就話冇收過相關報告。