【李八方online】會議太早?局長講40秒 臨時撥款2分鐘內閃電通過
財經事務及庫務局劉怡翔臨時撥款
【新增短片】
立法會今早9時復會,只係用咗不足兩分鐘,就通過咗涉及1,131億元嘅臨時撥款決議案。由於冇議員再想發言、同時冇人要求記名表決,本嚟昨晚還辯論得十分熱烈嘅臨時撥款草案,就咁閃電過咗。唔知係咪因為個會議太早,會內嘅議員得小貓三四隻,所以就咁放咗政府一馬,財經事務及庫務局局長劉怡翔喺通過後,即時輕鬆走人。
臨時撥款係等財政預算案未正式通過前,等政府有錢可用,金額大約係整份預算案撥款總額嘅25%左右。劉怡翔嘅發言亦只有40秒,話政府會再喺立法會特別財委會回應議員提問,呼籲議員先支持臨時撥款,讓政府可提供所需服務。由會議開始至通過,前後不足兩分鐘。
臨時撥款嘅決議噚晚開始討論,有7位民主派加1位建制派發言,大家都討論得面紅耳赤,民主派因為頂唔順民建聯周浩鼎嘅言論,紛紛發言,足足討論咗兩個多小時,但立法會主席梁君彥再次提早「放學」,會議提早結束,今早再續會。
臨時撥款兩分鐘內就通過咗,財經事務及庫務局局長劉怡翔輕鬆走人。