女神之所以是女神，好可能來自一份不自覺，過於自覺就流於港女。
新人蘇麗珊憑電影《哪一天我們會飛》角逐台灣金馬獎最佳新人獎，雖然未能獲獎，但已成為不少少男心目中的女神。Cecilia自言「女神」兩個字，對她來說似乎遙不可及：「對我嚟講好似觸摸唔到，讀大學時住宿舍，可能啲人見到我烏歪嘅一面，所以唔係好多人追。」Cecilia認為女星舒淇、湯唯才有女神的特質，她說：「佢哋好有神秘感，呢樣嘢好重要，可以令人好有幻想空間，如果乜嘢都畀人知道晒，就會少咗好多想像空間。而且佢哋都好典雅，我個人比較蝦碌，冇佢哋咁優雅。」

愛王大陸夠壞但細心

對於男朋友應具備的條件，她欲言又止想了一想，然後笑笑口說：「都冇特定條件講明『要有6呎3吋』或者點點點，最緊要有幽默感，同埋我好易俾男仔認真做嘢時嘅樣吸引到，見到我真係死㗎！有才華啦，都好緊要。」不過講到男神的條件，Cecilia就很簡單地認為「靚仔」加「大隻」就夠了，她笑說：「男神就梗係貪靚仔，彭于晏好靚仔又大隻。」
不過近日女神有新對象，就是台灣電影《我的少女時代》中的暖男王大陸，正正是「男人不壞，女人不愛」的寫照，她說：「鍾意佢夠壞但又好細心，我都有喊，喊得最勁係播返王大陸段錄音帶嗰段，好窩心同細心，好有愛，睇完出嚟隻眼腫晒。」