煲呔放假去美國避年,政務司司長唐英年以署理特首身份向市民拜年,唐唐噚日宴請記者到山頂白加道官邸食團年飯。八方睇唐唐越來越有特首相,見佢望住官邸個魚池啲錦鯉,就知佢非池中物啦。
全港市民被迫食貴雞,一雞難求之際,八方有幸獲唐唐請食雞,仲要雙起,活宰、冰鮮各一。唐唐問八方食唔食得出兩者分別,八方唔係食家,分唔出,唔似得唐唐食慣好嘢,一入口就分得出。呢隻豉油雞政治味濃,事關唐唐邊食邊硬銷中央屠宰政策,佢話既然大部份人食不知味,實施中央屠宰相信對市民影響不大。
唐唐唔只識食雞,講到紅酒更係專家,而且藏有紅酒數量甚豐,隨時媲美中小型入口商,因此山頂官邸不敷應用,要租用工廠大廈酒窖存放珍藏。
財爺取消紅酒稅後,好多飲家都將存放外國紅酒運返香港,以唐唐藏酒量計,自設酒窖可能更化算。
事實上佢對藏酒好講究,指酒窖要保持恒溫攝氏14度,又話其實自設酒窖最重皮係首筆裝修費,之後日常開支有限。
mailto:
[email protected]