莫雷拉上次賽事（24日）未力策「自動波」只跑第五令競賽小組唔滿意，因而被判停賽兩日。

賽後好多馬迷都認為小組罰得太輕手，質疑小組偏幫雷神，於相同情況下，假如犯規嘅係其他騎師，而唔係孭到飛嘅大騎師，後果可能唔止停兩日咁少。

小組過去嘅往績太差，有時好難怪馬迷唔服小組嘅判決。競賽小組上季被質疑放過潘頓，今次又令人覺得輕判莫雷拉，馬迷自然直覺小組優待孭到飛嘅大騎師。

平心而論，「自動波」跑唔到個第四，牽涉四重彩等彩池嘅派彩，特別隻馬係兩倍幾嘅大熱門，話對投注者冇影響就假，淨係罰停賽兩日，罰則真係太輕，對投注者可以話完全冇交代。

競賽小組按賽事條例，未盡力策第四變第五，騎師罰則係停賽兩日，嚴格上係冇做錯。不過，「自動波」係大熱門，加埋雷神嘅名牌叫座力等因素，其實競賽小組都應該全面考慮，只係一成不變按本子辦事，但結果係損害馬會同小組自己嘅公信力，仲令人質疑執法不公。

若果競賽小組處事較有彈性，按情況對未有力策罰重手啲，例如今次罰多莫雷拉兩日，肯定唔會有咁多人不滿，亦可以警醒啲騎師以後更加小心。

莫雷拉喺呢兩期賽事表現出奇地差劣，講到尾馬圈生態就係咁，開季以嚟莫雷拉狂風掃落葉贏得咁盡，總唔會次次都係佢威晒，到咁上下時間就會獲利回吐。

上次賽事莫雷拉連場熱門倒灶，埋單只係贏一場，相反澳系騎師贏咗八場，擺明呢日係開飯日子，呢種騎師輪流發威嘅實況，俾人嘅印象非常唔好，競賽小組都應該多多關注正視。

阿Joe