喺幕前消失咗一段日子嘅何婉盈，45歲，最近喺電視節目同好拍擋曾航生再度合體唱《再見亦是朋友》，結果惹嚟唔少迴響，唔少人都讚佢唱功比以前進步，反而係外貌冇乜點變，同當年分別唔大！

查實唔止何婉盈，同樣係港姐出身嘅梁小冰同埋陳松伶，佢哋嘅時間都好似停留咗喺當年咁。呢三個分別係45．46．47歲嘅女人，到底有何共通點？就係曾合拍94年嘅風水命理劇《清宮氣數錄》。

今日小冰喺微博貼咗同何婉盈、46歲陳松伶嘅合照，三個夾埋138歲，但感覺仍然年輕。席上仲有陳嘉輝(小冰老公)，王喜、黃淑儀、林嘉華太太劉寶珍聚會，小冰仲貼咗好多聚會嘅相片上網，留言謂：「昨晚暴雨下仿如隔世的美麗相聚，首先要多謝Ling姐同王醫生又大又漂亮又溫馨的家，神級廚神GiGi姐精心炮製又嫩又滑的洋蔥煙三文魚和香檸薑雞翼，Ling姐親自下廚包你食完再三回味的白汁蜆肉，重頭戲在於我跟松松相隔二十年後再合體，大家還記得我們合作過的戲嗎？當然還有何婉盈、王喜、Jumbo姐姐、Karen、Charles、陳生同一班熱情的朋友，溫暖又幸福的聚會！」

不過成輯相嘅亮點，除咗佢同何婉盈嘅合照之外，梗係小冰同松松嘅合照，佢話：「跟松松二十年前相聚，是在她的家裏，今晚再合體，那種溫暖夢幻的幸福感覺還是濃得化不開...祝願松松一生快樂幸福又美麗！」

小冰今日接受《蘋果》訪問，佢透過WhatsApp話：「係呀！松松相約我同何婉盈一齊飯聚呀。一齊飲香檳啦！可能太開心太興奮喇！有成二十年冇見又冇相聚，傾到半夜都唔願走，同時又慶祝何婉盈農曆生日又補祝嘉輝六月十三日生日，又請到我們的偶像神級㕑神GiGi姐(黃淑儀)親自下廚啦！好幸福啊！」

小冰又話：「松松跟我同何婉盈合作一部清裝劇《清宮氣數錄》而相遇相識相知相交，當年我們三人同時係女主角但就一場對手戲都無，所以合作非常愉快。那部戲當年有非常高的收視呢！直到九六年我同松松再合作《新上海灘》，在哈爾濱拍攝時就開始食飯約會了，記得我們對上一次相聚是二十年前在她家裏，當年還大唱卡啦ok呢。」