城城今晚首現身，到尖沙嘴YSL出席活動。問太太Moka是否很辛苦？城城話：「好辛苦呀！要好好對待呢個家庭。」又話好開心，而且責任大咗，「要花好多努力，要更加努力，希望得到大家祝福。希望工作同家庭可以兩邊兼顧。」

問城城可以分享小公主嘅相嗎？城城笑言：「我一向比較低調，今次見大家分享下，之後就唔會再講。」問道B女出世是否人生最高興一刻？他稱：「人生就係咁0架喇，要學習，學習緊點樣對待一個小生命。小生命嘅誕生，令我終於知道做一個爸爸係點樣。」

初為人父，問城城係咪成部手機都係B女嘅相？佢笑笑口話：「依家每日都有BB影相，拍片都要0架，因為嗰一刻真係好難忘好摯真。」

諗番BB出世一刻，城城表示好難忘，亦承認自己係緊張爸爸：「掛就一定會掛住嘅，但工作嘅時候就會好投入，因為我係一個專業嘅演員。」

至於會否幫BB改名？城城就話呢個重任要交俾長輩。至於百日宴或者滿月？城城話：「冇咁快，足月都希望一家人食餐飯。依家啲朋友搵唔到我0架喇，因為我要返屋企。我依家都好體諒之前我啲朋友，依家我好深閨，好少出街，轉變咗0架喇。朋友都想嚟探BB，但依家BB都係比較細，都係遲啲先啦。」