【韓流】《和遊記》公開長版預告 網民:十足《鬼怪》
車勝元李昇基鬼怪吳漣序和遊記
《和遊記》中女主角可以見到妖怪,又可以召喚男主角保護自己,被指有《鬼怪》影子。
曾編寫人氣韓劇《最佳愛情》嘅編劇洪氏姊妹(洪貞恩、洪美蘭),新作《和遊記》(前譯:花遊記)將於23號喺tvN首播,由退伍男星李昇基扮演孫悟空、車勝元飾演牛魔王、吳漣序演唐三藏、FT Island嘅李洪基飾演豬八戒。
劇組公開長版預告谷劇,講到唐三藏早於25年前就已經遇上孫悟空及牛魔王,而且分別跟二人定下契約,當中要孫悟空守護佢,而唐三藏只要叫孫悟空個名時,孫悟空先會出現。不過25年前孫悟空就奪走唐三藏嘅記憶,所以25年來都冇機會出現,今次孫悟空搵到唐三藏,就係要求同佢重新定下契約,不過被唐三藏拒絕,指自己唔會再被騙。另外,牛魔王覺得唐三藏依家生活得太平凡,於是畀咗個金剛箍唐三藏......
另外,劇組今日再公開李昇基跟吳漣序嘅劇照,照片中吳漣序依靠喺李昇基嘅肩膀上,而且面露甜美笑容,氣氛曖昧。
有網民睇完預告之後,就指《和遊記》中女主角可以見到妖怪、自少跟男主角有淵源、可以召喚男主角保護自己、人類跟妖怪相戀嘅設定,都似十足人氣劇《主君的太陽》跟《鬼怪》嘅混合版,加上劇迷對洪氏姊妹有信心,大都表示非常期待新劇播出。
更多韓流,喺晒《娛果》
http://fb.com/appledailyent