還有天地能前往，還有生命發光，自覺同候任特首林鄭月娥步伐唔一致，即將離任向外闖嘅政制及內地事務局局長譚志源，7.1前繼續喺獅子山下且共濟，夕陽任內同問責團隊步伐一致，響應號召落區探訪慶回歸。

佢今日就到油尖旺區出席「共慶回歸顯關懷」活動，話油尖旺區喺全港有最多少數族裔居住，係多元文化滙聚社區；既是同舟，佢都希望透過家訪向社會傳遞關愛共融訊息。講到家訪，又點可以兩手空空吊吊揈？佢聯同義工向受訪家庭大派禮物包，收到大大包禮物嘅市民都開心到笑騎騎。

誰也經歷過迷惘，譚志源決定喺回歸20年之際，選擇離開官場展開新旅程；至於香港發展嘞喎，佢就話回歸20年係香港嘅重要新里程，認為香港成功落實一國兩制，喺各方面取得成就，都係有賴社會各界並肩而行、群策群力，相信佢都希望這小島走下去。