麻煩多多嘅利物浦前鋒巴洛迪利，喺「雙紅會」下半場中場後備入替，雖然佢冇好似謝拉特咁出場唔夠1分鐘就領到紅牌被逐，但去到比賽尾段巴神同紅魔嘅基斯史摩寧發生衝突，好彩場邊嘅利物浦球迷出手拉住佢，先至冇令情況惡化。

話說當時巴神同史摩寧爭波，點知畀對方搞到佢撞埋場邊廣告板度，巴神即刻反應好大咁想捉住史摩寧同對方理論，好彩場邊嘅球迷手快拉住巴神，順利化解咗一場風波。其實巴神之前已經有一面黃牌在身，如果唔係有球迷拉住，隨時同史摩寧兩個嘈起上嚟再攞牌，宜家兩位球員都冇畀球證警告，真係要多謝球迷啦！