雖然德甲禾夫斯堡對波琴場波，並唔係今日主打，但由於禾夫斯堡最近弗到震，加上佢哋有迪阿歷山度加盟，令到呢場波幾矚目。講開呢個阿根廷好波之人，日前佢喺記者會強調自己身高一米七四，而唔係傳媒所報嘅一米六三，慌死人再叫佢做矮仔咁。
呢位哥仔似乎都幾介意俾人話矮仔，人哋記者未問佢已經爭住講。不過，幫佢度身做西裝嗰個師傅就踢爆阿歷山度無一米七四，頂多一米七○至七二左右。
查實我哋睇波嘅懶得理佢係咪矮仔吖。阿歷山度講過以朗拿度為奮鬥目標，得唔得就未知，起碼佢着住嗰套禾夫斯堡老西，係同皇馬套老西同一個贊助商。唔知咁算唔算踏出球王之路第一步呢？

伊圖發老脾博炒
馬略卡前鋒伊圖有可能過檔車路士，已經係公開嘅秘密。日前佢就為咗好小事同教練柏捷高大吵一場，博唔撈定嘞。話說練波嗰陣，成班人着短褲，佢就懶型咁着條長褲，柏捷高叫佢換褲，佢就發晒老脾大聲講：「唔操啦！」態度認真差。

巴亞去保頓試腳
重記得巴亞上季為AC上陣時，唔少球迷連佢係乜水都唔知，堂堂前法國國腳都算悲哀。原來佢最近去保頓試腳，跟埋隊波去馬耳他比賽，而前日保頓贏弗利安拿五比一佢重有波入㖭。近年佢咁唔順境，希望呢個入波幫到佢爭取張長期飯票，同法國友佐卡夫拍住上啦。