荷李活影星尊尼狄普（JohnnyDepp）被老婆安芭赫德（AmberHeard）指控家暴一案都未開審，安芭被指搭上超級大富豪馬斯克（ElonMusk），近日經常同馬斯克一齊。出生於南非嘅馬斯克來頭好勁，佢係美國PayPal創辦人之餘，仲係汽車品牌Tesla創辦人兼行政總裁，根據美國財經雜誌《福布斯》，馬斯克身家高達124億美元（約967億港元）！

據美國TMZ網站報道，30歲安芭同45歲馬斯克已經識咗幾年，喺過去幾個月關係好密切，上個星期安芭及家人去咗馬斯克喺邁阿密嘅酒店玩，兩周前安芭同馬斯克單對單食飯。最近安芭上過男方喺洛杉磯嘅公司，而馬斯克又去咗安芭屋企幾次。馬斯克嘅婚姻狀況同安芭一樣都係搞緊離婚。