林二汶噚晚喺旺角麥花臣場館演出《音樂蜂一周年音樂會》時，由於表現極high，冇留意台上有罅，失足跌咗落去。雖然哥哥林一峰即刻扶起佢，但二汶左眉角爆0左，仲流好多血，連夜入院，幸無大礙。二汶自言只係反應有啲慢，但冇乜事，又合十多謝大家關心。

今早二汶於fb報平安，寫道:「親愛的各位，多謝大家嘅關心！我已經出院而且無大礙，縫左七針，傷口冇咁痛喇：）嚇親大家唔好意思～我下次會好小心架喇！多謝你哋光臨《音樂蜂人園》，你們才是最好的！我愛你們～」

其實二汶今日原定到北角出席梵音歌唱家女尼瓊英卓瑪（AniChoyingDrolma）「以愛重建心靈音樂會」記者會，但因為受傷，最終缺席，由一峰獨撐。

一峰到場後亦代妹妹向大家報平安謂：「大家唔使擔心。原本妹妹都嚟，因為佢之前幫Ani監製過一首歌，但就真係要休養，所以嚟唔到。」

一峰仲話，事發之後其實佢好驚，特別係二汶入院之後。一峰話：「我個妹去咗急症室之後，其實我係好驚，因為佢話見暈，但原來佢只係肚餓，媽咪send咗幅相畀我，佢話妹妹食得好開心。」雖然屋企人好擔心，但當係「鴻運當頭」。

雖然二汶話冇事，但原來要縫7針。一峰謂：「醫生同佢check晒，冇事，係皮外傷，要少少休養，所以有一部彭秀慧導演嘅電影佢就拍唔到，因為原定聽日要開工。」

一峰表示二汶年尾喺同一會場(即麥花臣場館)有個演唱會，今次係不幸中之大幸，希望下次會小心啲。一峰又笑道：「其實佢由細到大都咁靈活，唱咗10幾年歌，唉，意外就意外！」怕唔怕二汶有疤痕？一峰話：「未諗，個人開心就得，同埋佢係靠把聲搵食，其他嘢可以慢慢處理。喺我心目中，佢點都係好靚，今次係enjoytheshow，多謝大家關心。」