港股繼續高位整固，港滙持續回軟，觸發資金回流公用股，中電（002）、煤氣（003）及電能（006）造好，煤氣更創歷史新高。隨着新春假期臨近，港股成交勢必越縮越細，戰友短炒寧揀有成交配合嘅異動股，否則在陰乾市況好易失去戰意，屆時輸手續費都輸死。

中信國際電訊（1883）早前宣佈，以90億銀現金收購澳門電訊79%權益，持股將增至99%；以去年澳門電訊盈利8.98億銀計，收購歷史市盈率12.7倍，較本地上市嘅數碼通（315）及和電香港（215）平均市盈率14.8倍，折讓14%。當中最值細味地方，就係中信電訊打晒開口牌，話有機會透過供股集資支付收購代價。從陰謀論看，講明要供股，散戶肯定唔敢掂，有心人更加容易將股價舞上。
中信電訊噚日收報2.75元，逆市抽升5%，突破旗形走勢，成交亦配合，月中高位2.87元隨時只係中途站，自問夠膽嘅戰友，不妨小注博大茶飯。

唐牛