舊年同今年經濟基本上係兩個唔同嘅世界，啱啱有唔少公司舊年業績仍相當省鏡，但與此同時業務性質亦同疫情關係不大嘅，為數唔算多，所以當市況好返，就會繼續被追捧。

今日先講中建材（3323），啱啱公佈舊年業績，純利升38%絕非重點，重點係負債包袱逐漸解除，末期息仲增加差唔多1倍。

中建材向來係負債超高、財務上瀕臨執笠風險嘅公司，捱咗咁多年，減債大計喺今次業績正式宣告成功，負債比率由過往高過300%，減到舊年年底嘅201%，比預期進度快得多，仍然係高風險但已非面臨破產風險。淨負債1,622億人民幣，假如今年經營淨現金流保持舊年嘅633.48億，今年底中建材將會變成負債率低於150%嘅公司，業務仍有偏高槓桿優勢。

中建材舊年毛利增幅只得17.6%，融資成本少咗接近20億，呢個因素為稅前盈利貢獻一成增幅。隨住全世界融資成本下降，加上中建材債務負擔大減，融資成本下降速度會再加快。喺疫情之下，水泥行業幾乎係第一個復工行業，而大陸3月前兩周申報基建項目金額高達3.5萬億人民幣，中建材收入前景一樣可觀。計返舊年市盈率只得5.8倍，仲要估計今年盈利上升，市盈率再壓低。水泥股之中，佢股價最強，相信喺周期股之中，都會係其中一隻最強。

晉佳

https://www.facebook.com/advanceguy1