中美糾紛去到資本市場層面，美國有議員提草案加強對在美上市中資監管，阿里亦急急腳嚟香港上市。既然同股不同權大門已重開，未來有中國企業要選擇為國家吸外資，都只能選擇香港，港交所（388）近期跑贏大市合理，睇長線圖，似有破300蚊嘅勢。

即使中美貿易戰立立亂，但錢實在多，炒未來概念嘅股票供應實在少，仲要呢個年代，乜嘢A輪、B輪、C輪，唔使等到上市就可以集資發展，等到IPO買到已經食緊十手飯，一係就畀Google、Microsoft、騰訊、阿里之類收購咗。有未來概念嘅公司，要佢單獨上市甚難，僧多粥少，難怪史上第一隻人造肉股Beyond Meat，畀人搶到天咁高。

Beyond Meat憑住疑幻疑真嘅肉體味道、質感，加上只得1,100萬股份流通量令其貨源歸邊，於是挾到百億美金市值，估值反映人造肉若干年後取締部份真肉市場？講緊佢嘅漢寶扒，卡路里同真牛扒相若，鈉仲高過真牛肉。當然無理由咁短視去睇佢，味道、成本、營養價值只會繼續進步落去，未來必有一定市場規模，但股價率先反映到如斯樂觀，實在係過份，但亦可以話係趨勢。

上市不久嘅未來概念股有Uber、美團（3690）之類，當然基數不低，但配合自駕概念必具爆發性。Intel自駕的士下年以色列試推，佢個CEO估5年後將會有好多自駕車喺街度行。雖然即使未來有5G，自動駕駛仲要克服天雨、落雪等等惡劣環境，但概念越嚟越近係事實，一旦做得到，幾可肯定顛覆運輸業。未來概念畀你買到一定天生有缺陷，又有盈利又有強勁現金流？畀你平買就奇了。

晉佳

https://www.facebook.com/advanceguy1