香港小姐噚晚已經圓滿結束，幾個獎項亦而已塵埃落定，雖然賽制上同埋所謂嘅「網民投票」有好多爭議，但係似乎就未有影響到今日一班佳麗出嚟面對傳媒。

其中一個爭議好多大嘅「最受觀眾歡迎」獎，張寶欣突然爆多like後來居上奪得，大會仲搵埋佢喺上屆參選過嘅家姐張寶兒頒獎，今日見傳媒，張寶欣就表示經過一晚之後心情已經平伏返，而噚晚仲同家姐一齊去咗食餐好嘅慶祝。但張寶欣最終都入唔到三甲，佢就話：「大會有好專業嘅睇法同眼光，所以我覺得呢件事好公平，同埋我覺得三甲嘅佳麗佢哋都非常出色。」

至於有人質疑選冠亞季過程兒戲，尤其係嘟姐鄭裕玲竟然可以投兩票，季軍黃瑋琦就話：「唔會覺得唔公平，十個評判都是非常之好，佢哋睇咗好多年香港小姐。」而「受害人」亞軍何依婷似乎冇不滿：「其實冇公唔公平嘅說法，每一年港姐賽制都唔一樣，今年美麗大學幾新鮮，每人嘅審美眼光都唔一樣，冇咩大問題。而且嘟姐係校長，校長有決定權好正常。」但差一票輸咗俾冠軍雷莊𠒇，佢大方咁話：「我覺得Juliette好有自信，係位多才多藝女仔，贏係實置名歸。」

另外網民談論得最多嘅係，有好多人覺得港姐三甲唔多靚，黃瑋琦話：「我哋三個都非常好，表現好，好多嘢可以進步。」何依婷就覺得每個人審美眼光唔同，唔會在意呢啲評價。