今日有馬跑,但就唔見馬場常客兼馬主郭富城,反而見到佢嘅ex——熊黛林(Lynn)。是日Lynn同馬德鐘太太張筱蘭到沙田馬場出席「仁濟盃賽」活動,穿上背心裙配珍珠鏈嘅Lynn明艷照人,佢話:「平日做嘢都有入過馬場,做觀眾都係第一次。」
Lynn唔識買馬,但就好幸運咁贏咗幾百蚊:「我諗住支持下仁濟盃嗰場,我唔識,聽朋友講買2號,拎咗100蚊出嚟,收返400幾蚊呀。」見到馬迷肉緊狂嗌,Lynn就話:「我比較斯文冇狂叫,不過最後都有叫出嚟,好玩過睇電視。」
同場仲有阮兆輝之子阮德鏘,佢喺微博晒咗疊五百蚊紙,夾夾埋埋成7千。阮德鏘話:「一個馬牌,一個仁濟慈善杯。一個善於(得分)嘅Aunt。就係呢個組合,贏多咗一疊鈔票。」好曬呀!!!