nowTV將於年初三推出賽馬頻道，直至呢個賽季完結期間，客戶可以免費收睇呢個頻道，以及享用唔同選擇功能，包括隨身睇、自選服務、重點跳播、自選評述等等，而且仲搵嚟黃婉曼(Icy)擔任主持。

問到今次投資係咪好昂貴﹖有冇8位數字﹖nowTV首席副總裁及製作部總經理何麗全表示冇8位數字咁多，但一切都係值得。會唔會搵馬主，例如郭富城等等亮相節目﹖何麗全話張智霖喺年初三現身馬場，如果時間許可，會邀請對方去nowTV廂房傾下偈。

Icy今日都有出席喺跑馬地馬場舉行嘅記者會，佢話為咗呢個頻道做咗3年準備，因為佢依家有幫馬會做節目，有馬圈前輩叫佢試下講馬，所以佢要增值自己，前兩年開始刨馬，之後開始寫馬經，由淺入深。Icy好叻女，成日都貼中，之前仲中過「六環彩」，用幾百蚊買，點知贏咗幾萬蚊，搞到佢話可以變全職，不過始終都係要少賭怡情。

男友會唔會同佢一齊賭馬﹖點知Icy話佢男友係超級專家：「我都有賴於佢，我有唔少貼士，佢都有幕後一大功臣，所以有共同興趣係要。」同馬咁有緣，不如將來喺馬場舉行婚禮啦，Icy話：「有贊助可以考慮，我淨係想同馬仔影相。」有人提議佢倒不如快啲生個馬年BB，佢大笑話：「都係，我都鍾意馬，盡快啦！」希望今年聽到你個好消息啦！