【利字當頭】Kyle Bass其實只係叠碼仔（利世民）
蘋果日報 2020/06/18 10:17
利世民利字當頭
風險，如果係可以預計，叫做calculated risk；賭就係calculated risk。識計數就唔會賭；賭仔，一係就唔識計數，一係就計錯數。唔可以預計嘅，叫uncertainty。
舉個例。骰寶，一係開大，一係開細，一係圍骰。大細出現嘅比率，唔係一半一半，而係17.5/36，但只係1賠1；圍骰呢，1/36機會，但只係1賠24，食水更深。長賭，莊賺硬；如果唔係，邊個出糧畀荷官呀？咁點先係uncertainty呢？假如有人好似Ocean's Eleven咁，去搶賭場夾萬嘅錢，咁就係估佢唔到嘅uncertainty喇。
點解講uncertainty呢？話說，呢個世界，唔係好似擲骰仔咁，只有6個可能，亦唔係好機械咁重複簡單嘅程序，所以，原則上大多數嘅事，都係屬於uncertainty嘅範疇；原則上，事前估計嘅機率，參考價值有限；事後呢，都發生咗，唔係1，就係0。投機市場好玩之處，就係每一刻都有人覺得有其他人估錯，亦都係因為咁，先至有成交。換句話說，投機市場嘅雙方，總有一邊係睇錯；拉勻計，其實大家都係輸畀個莊；再引申落去，必賺，一係做莊，一係做荷官，一係做叠碼仔，再唔係，就做Ocean's Eleven。
好，咁Kyle Bass賭港滙會脫鈎，又應該點睇？佢老哥，嚴格嚟講都係做叠碼仔啫，真係無得輸。佢教你買，贏，佢抽佣，輸，佢就同你講句：「下次贏多啲！」呢啲咪實賺囉。又咁講，好似十二碼，一係入，一係唔入；聯滙呢，脫同唔脫嘅機率，理論上係側埋一面，亦即係所謂嘅tail-risk。理性嘅投機，就係機會再細，只要賠率夠高，都可以博吓嘅。但點都要講，一個再硬淨嘅聯滙，都係設計嚟捍衞港元，而唔係做成個金融制度嘅lender of last resort；所以就算金管局都唔會話自己係央行，因為央行號銀紙可以任印，貨幣發行局就唔得；亦係呢個原因，金管局要管到銀行好緊。嗱，所以與其賭聯滙脫鈎，不如賭金融機構出事。實情係，近來發生嘅事，全部都係tail-risk嘅範疇，金融系統風險增加，又有幾奇呢？金融系統出事，當正如賭場畀Ocean's Eleven做世界，真係uninsurable㗎！
利世民
-----------------------------
-----------------------------