【新增內容】
與韓國樂隊CNBLUE及女團AOA同屬FNC事務所嘅5人男團N.Flying，於2015年正式出道，不過發展平平，當中26歲成員權光珍今日更爆出醜聞，被粉絲要求佢退團。

據網民噚日公開嘅爆料文章透露，權光珍由出道開始就不斷勾引粉絲，同粉絲拍拖，甚至喺粉絲簽名會上性騷擾粉絲，文中亦寫道權光珍曾喺簽名會上用雙腿夾住粉絲嘅腳，要求對方跟自己交往。

爆料嘅網民又稱權光珍曾喺背後講N.Flying其他成員及公司嘅壞話，又曾公開侮辱粉絲嘅外貌，話對方嘅長相要喺外國先叫靚女，以及曾向遭受約會暴力而患有抑鬱症嘅粉絲講：「你再咁落去就會淪為妓女。」

爆料文章引起粉絲熱議，紛紛發起要求權光珍退團嘅抵制行動。

另外，爆出醜聞後，FNC就發聲明，指與權光珍確認後，部份網民所述有關同粉絲拍拖及性騷擾部份都並唔係事實，但確認佢曾同粉絲有所接觸，又指：「無論出於乜嘢原因，除了公開場合以外，個人確實同粉絲進行咗交流，呢點作為成員係屬於不當行為，經過深入討論後，權光珍決定退團，佢將全面中斷演藝活動，進行自我反省。」

精選韓流，喺晒《娛果》
http://fb.com/appledailyent