狄易達噚晚喺新光戲院舉行演唱會,老闆陳百祥同黃杏秀、楊焉同埋達仔一班好友張秀文、樂瞳、龔嘉欣、黃宗澤緋聞女友林穎彤等都有現身撐場。
達仔喺台上又唱又跳,仲即興請樂瞳上台伴舞,佢拉樂瞳埋床邊唱情歌,之後索性推樂瞳落床,仲以男上女下方式嘴佢額頭,之後又從後攬佢,搞到樂瞳都有啲不自在!
狄易達話希望下年可以踏足紅館開騷,仲話聽到歌迷尖叫有生理反應,但點解佢前晚冇錫吳若希,但噚晚就錫樂瞳呢?佢話﹕「佢個樣好冧,冧到我都俾佢吸引住。」咁緋聞女友劉沛蘅(Hillary)會唔會呷醋?佢就話﹕「睇佢點睇啦。」之後Hillary喺Instagrampost佢地兩個後台合照,仲話以達仔為榮添,即係冇呷醋啦。