巴西全隊球員非常交足功課，大前日都重喺西班牙見到朗拿甸奴及卡路士在西班牙踢緊聯賽，八千里路雲和月，兩日後便見到二人在香港大球場鬼打冇咁精神，踢到會飛一樣。未曾現場見識過，真係唔知踢波可以踢得咁優美、咁瀟灑、咁出人頭地，全場球迷九十分鐘不斷睇到嘩嘩聲，大叫好波。
一定要讚一讚港隊龍門范俊業，上半場忙個不亦樂乎，左飛右撲，如果唔係屢救險球，上半場已輸十比零。一大拖三細，四個人已花掉三千多元入場費，咪話唔肉痛，不過好彩有八個入球，圍起嚟一百元一球，算有交代。
有口痕友話巴西隊識做人，專登俾港隊入一球，我話呢個不可能，如果係代表球會嘅話都可以隻眼開隻眼閉，但孭住國家隊則不能求其，每輸一球都入國家隊數。一球勝萬金，希望隨着港隊轟入巴西隊的一球，打開香港雞年的好運。