新股熱潮又到，雖然今次冇乜大國企招股，但係武夷藥業（1889）、美維（3313）兩間公司集資額都唔算細。
另一方面，藥業股除咗武夷之外，市場傳聞有兩間藥業股亦都排緊隊上市，因此近排廣州藥業（874）股價升極唔停，不過廣藥往績PE已達27倍，仲可以升幾多頗成疑問，至於武夷，備考全面攤薄PE介乎17至26倍，即使以中間價計，PE都有成21.5倍，抽得中又可以升得幾多？
同樣係藥業股，而且產品種類相似嘅，有神威藥業（2877）同埋博智（1149）。以抗血脂藥為例，武夷嘅抗高血脂中成藥物「蘇子油軟膠囊」將於今年上半年獲批文生產，而神威旗下治療心血管疾病的膠囊，係主打產品之一，至於博智，去年已推出7種中藥保健產品，包括護肝藥及降血糖茶等，另正研製治療糖尿病藥物。
神威往績PE約12倍，截至去年6月底止中期業績，純利升1.4%至1.73億元，假設下半年純利一樣，現年PE係11.3倍，博智更抵買，往績PE約5.8倍，上半年度純利4376萬元，升37.6%，假設下半年純利一樣，現年度PE只係4.4倍。二揀一梗係買估值又低，成交又夠多嘅博智，追回20倍以上PE，仲有排升。

美維影子股未見有勢

財爺家族旗下嘅美維控股，招股預測PE係8.2倍至10.35倍，平過由建滔化工（148）分拆上市嘅建滔積層板（1888）的22.8倍，相信招股反應會好過武夷。炒美維影子股，奕達（2662）股價長跌長有，高位累積蟹貨甚多，都幾難炒得起，至卓國際（2323）估值算平，PE僅6.8倍，可惜成交比較疏落。數到成交稍多嘅大昌微線（567），去年12月急跌後現正反彈，似乎係較為博得過嘅影子股，守得住2元應仲有得彈。
歐陽風