偷食有前科嘅吳浩康（Deep），一而再，再而三挑戰女友鍾舒漫底線，背住正印狂媾女，鍾舒漫唔單止取消婚約，日前自認單身，又將阿Deep降呢做「普通朋友」，有指鍾舒漫仲向阿Deep收番屋企鎖匙，睇嚟佢哋散硬。

但讀者Sally前晚喺銅鑼灣總統戲院附近，就透過本報「爆相爆片」踢爆佢哋假分手，據讀者報料眼見佢哋過緊馬路都講到雞啄唔斷，全程都係鍾舒漫講最多，阿Deep好留心聽，有時仲畀鍾舒漫o氹到笑，睇嚟佢哋普通朋友關係又升溫。

阿Deep同鍾舒漫拍拖兩年幾，兩人掟煲唔掟蓋，阿Deep諗計箍煲。前晚九點幾，阿Deep就同鍾舒漫夜遊，鍾舒漫今日喺電話中話：「我哋o依家仲係朋友，呢段時間都有聯絡。」復合？鍾舒漫話：「唔係唔係，冇啲咁嘅事。唔答呢個，將來嘅唔知。」一齊去邊？佢話：「我o依家變番正常生活，我要工作，亦都有社交，同佢keep住聯絡，就係咁，最緊要我哋清楚自己定位。」兩人o依家乜嘢關係？鍾舒漫話：「同之前答嘅一樣，我哋唔係陌生人，如果我同人出去會有嘢講。」問阿Deep係咪有復合機會，佢今日喺電話封嘴避談：「唔答，唔好意思，我唔講太多。」