講到話第一條保險線由以前$8,000跌到依家得$6,000，今日率先試玩嘅亞視新任CEO吳雨就稱：「唔……應該……我諗我諗就一樣嘅啫！啲題目就淺啲！」少咗兩千蚊喎！吳雨笑：「咁個獎金最終最終都係100萬嘅！」跟英國原裝《百萬富翁》？原來第一條保險線個range調至$6,000，係英國版權持有人要求，因為佢哋計番條數，呢個先係正確，以前嗰個版本錯咗。

係咪諗住每集慳$2,000？吳雨話：「都唔係0架，晚晚有100萬擺喺度，你有權攞，你可以$6,500萬你攞晒0架！任何嘢都可以慢慢調節，唔緊要嘅，可以爭取（指向英國），刺激啲，第一條保險線過$10,000先跳第二條都得。」吳雨又指英國新版《百萬富翁》俾六七個人玩，冇以前單對單咁刺激，所以亞視都係用番舊版，貪佢夠刺激、可以互動，而且觀眾都可以玩。

吳雨謂，《百萬富翁》頭一個禮拜都係玩慈善版先，到時都會請明星出席。咁係咪請多啲英皇藝人呢？吳雨表示：「等監製搵啦！我唔出手喇，欠好多人情呀！有排搞呀！」

首集《百萬富翁》將於下月29日（開台台慶）推出，周一至周五晚，至於第一集特別版會點做，依家仲度緊，未透露得住，但預告一定有巨星出席。

更多娛聞，喺晒《娛果》
http://fb.com/appledailyent