一向都好愛護小動物嘅鄭秀文(Sammi)，近日頻頻喺ig貼圖兼留言，原來佢同許志安嘅13歲狗狗Lucky，因為第8神經有問題要睇醫生，由於唔想佢麻醉做手術，故睇中醫療法，仲話體會到自己兒女咁照顧，突然有病都有驚，望住佢都會流眼淚。(新聞連結： http://bit.ly/2AEVXBm )

正如Sammi咁講，為咗照顧Lucky，佢哋兩公婆都夾好時間，點都要有人留喺屋企照顧Lucky。講番Lucky病情，原來佢病發嗰陣，會忽然行路東歪西斜，又會四肢無力咁企唔到起身，Sammi仲拍咗條片，內容係Lucky睇獸醫嘅情況，亦俾其他人做個參考，佢話：「我們只能用大毛巾把他托去樓下大小二便，他很乖很乖不哼一聲，但兩隻眼珠瘋狂的晃動，我拍着這些影片以便醫生可作參考，因Lucky的身子會忽然抖動，我希望可以拍得到給醫生看......但不成功。」

經過醫生嘅治療，Lucky嘅情況總算穩定落嚟，Sammi話：「由於Lucky年紀非常大，身體有很多不明朗因素存在，仍需留院觀察，但他已經可以坐起來，有胃口，有大小便，有撒撒嬌（雖然牠已經是十二歲的老人家），他亦開始願意嚐試落地走路（雖然行路仍不穏而且傾斜..... ）#很深的體會 #生命缐前一切都根本不能相提並論 #什麼名利得失榮慾輕於羽毛不值一顧 #一家人齊齊整整就是最美好的財富#這幾天家中缺少了Lucky感覺很不完整像一幅丟失了很多塊的puzzles。」

o依家已經出院返咗屋企休息，今日Sammi更新咗IG，講到Lucky嘅情況，佢話：「在網上訂購嘅狗狗尿褲shipping 下星期才到，不過用成人尿褲也不錯，size 雖然不perfectly fit，不過仍能發揮作用。Lucky仔一直好乖，努力配合我們為佢嘅安排。##着咗尿褲嘅Lucky有點喜感 #啫啫位置有點龐大 哈哈！mi係鹹濕媽咪。#家有一老如有一寶#珍惜 #感激工人姐姐一直幫手照顧而且非常真心疼爱Lucky #多謝doctorHilary #多謝護士姐姐哥哥們」

查實Lucky對Sammi同安仔嚟講，可以話意義重大，有報道話喺佢哋結婚前，Sammi因為逼遷而搬咗去同安仔短暫同居三個月，直至結咗婚後，Lucky一直住喺舊居，不過Sammi嗰陣覺得Lucky年事已高，再加安仔又經常出外工作，所以決定將佢接返去新居一齊住，實行一家團聚，仲當咗Lucky係仔一樣咁看待。

更多娛聞，喺晒《娛果》
http://fb.com/appledailyent